Tameskanit n tsednan g Igwelmimen

Ass n 17 nuwanbir 2955 (29/11/2005), ffγent-d tsednan (tilawin) n yiγrem n Igwelmimen γer tsukt (ubrid) i wakken ad d-sseknent reffu-nnsent mgal n imeggan n yiwen usenfar n usewken n tgwemma (ixxamen) yaγulen iga amihan γef imezdaγ n yiγrem. Yaγul usenfar-a netta d win uswar n iqudas n waman luγnin d amihi izemren ad iserdel kigan g tmezduγin n yiγrem-ddeγ aqbur.
Ssekren imezdaγ n Igwelmimen yiwet n tmeskanit (tmesbanit), ass n waram 17 nuwanbir 2955 (29/11/2005). Tuget g imedrawen g tmeskanit-a gant-tt tsednan d tegz’iwin inekren ar ttz’eggant mgal n tigi n inemγuren idiganen d iγelnawen (taγiwant akw d uγlif n uzduγ) issentan yiwet n twuri tanefraγt g usewken n iγerban n yiγrem min ad ssfelden i wawal n imezdaγ is ran tawuri zund tennaγ.
Kkan imeskaniwen asuk axatar, ar ttasin imesγerten zund : "Wa Bibiw ! Wa Bibiw ! da itt’ar iγrem-inew ! Slogans", "Hada εar ! Hada εar ! Iγrem-inew g lxat’ar !",...
Ar sγuyyunt tsednan s wurfan d yiqiq acku ddant ad redlent tgwemma-nnsent ittus’kan s walud’ iddzan d tgejda n tezdayin s tmentilt n gar asewken. Iqqen-aγ-nn ad nales i wawal γef teflit n tzuliγin nna ittusewren s ubrid iferγen d gar taγara, aya yugel-d taruz’i n wudus amansay n tmajjrin d ussiwey n waman n unz’ar.
Nekren “imessewkenen” kud ssukufen send’ad’en iced’ran n iγerban, ttun neγ ur rurin taγd’eft i umihi nna tga temhelt-nnsen nna ur ittusγiwsen s wudem iγudan i tmezduγin tiqburin d imezdaγ digsent illan.
Ssutren imeskaniwen d tmeskaniwin g yimennebd’en-nnsen ad zzgan din din tamhelt-nnsen tarenbat’ ; ur diγ ttun tuttra n uzerf-nnsen g uzduγ yuklalen isem-nnes ; akud-nnaγ ayd usin awd imesγerten zund :
- Mayed ran imezdaγ ? Tiyedrin s’h’anin !
- Utat s ufus tutim s ud’ar tinim s imi : Id’ra yiγrem-inew !

Teggra tmeskanit s yiwen ummegraw axatar g yimi n iγrem n Igwelmimen, ammegraw nna g umz’ent awal mennawt n tsednan issakzen ayenna mi rant ad ittug akw d tuggdiwin-nnsent.
G tiggri, zeγnent tmeskaniwin iba ummid n yirgazen, γetsent ad d-mmegrawent tikkelt yad’en ass n umhad 19 nuwanbir 2955 (1/12/2005) seg temrilt tiss 10t. Yusa-d ufran n uzmez-a d urzaf nna ran ad d-gen imennebd’en idiganen γer uzazzal-a n uzwar.
Ad nessektey imeγriyen nwis da tettusudus g yiγrem-a, kraygat aseggwas, tfaska n Wudayen n teεcurt ; maca, ur da kkaten yimran n tfaska-ya anfa g yiγrem n Igwelmimen neγ g imezdaγ-nnes tt-issudusen.


Ad’ris yaru s tefransist Yidir
Isuγel-t-id γer tmaziγt Σumar Derwic

Amawal n wed’ris a