Kamal

Ad’ar yiwen ur γ-t-iqerred’, imi i tira yuli llsas.
Seg wallaγ tura ammus yefred’, terra-t tmaziγt d afessas.
A win yenwan a t- tafed’, yura i warrac i tullas.
A mass Kamal Uzerrad, terrid’-aγ yal id’ am wass.
S tafat-ik a mass nettwali

Âez’rayen yendi iweryan, yessa i yal amd’iq h’ented’.
Ladγa nekcem εemr’ayen, s ajeğğid’-is akk nent’ed’.
Medden deg yiman-nsen εyan, ker’hen ad asen-tessiwled’.
Kečč turid’-aγ-d aweryan, n izarismen d-tessufγed’.
Tunt’ict-ik amek a tt-nettu.


S tmaziγt i turid’ ussan, taswast, utt’unen, agguren.
Aseggas, awines, agimilan, amdan di tmetti war uguren.
S amulli n Masin ur nessen, lγaci s tujjma i nnubegten.
S axxam-ik γer tgebta a d-asen, γer webrid ih’eddaden.
A s-nderrez i Maziγ-ik


Tiziri ted’fer-d tizwar, Azza yerna-d deffir Wezwaw.
Adlis-ik ccan-is meqqer, seg tezwart γer wedriraw.
Semmus d mraw di djember, agim tz’a n timad’ tam d semmusan.
Tunt’ict n wassen ur teffer, tlul-d tafat n wussan.
D amulli-k a mass Uzerrad.


Tikta γur-k lamčči d yiwet, ulac tamnat’ ur tnudad’.
Am umawal n timmarewt, idlisen-ik ma ten-id-tadred’.
Wa yezz’a wa yesserwet, kečč tettnadid’ tettafed’.
Akud yetγurren ur k-iwet, Yakuc a k-yeğğ ad teddred’.
Nessaram-ak teγzi n tudert.

Essaïd Aït Maamar